Kung dami ng naipong papel ang pagbabatayan,
malamang 'pinakamayaman' ang mga titser.
Kung masusunog ang kanyang bahay,
tiyak na kanyang bangkay ang pinakamatutupok ng apoy
sa dami ng papel na naipon sa kanyang silid.
Sa nakalipas na bakasyon, nangahas akong
linisin ang aking mga istante at kabinet.
Saku-sako at kahun-kahong papel, magasin, libro
at mga babasahin ang aking natipon.
Ang iba ay ibinenta ko sa junk shop at book shop.
Ang ilan ay ibinigay ko mga silid-aklatan ng kalapit
na mataas na paaralan at itatayong kolehiyo
sa aming lugar. Sana pakinabangan nila.
Itinira ko naman ang iba para magamit ko pa rin
habang ako'y nasa propesyong ito.
