May kaisahan ang ilang taga-Mababang Kapulungan na ipawalang-bisa ang PD 1177 na awtomatikong naglalaan ng pondong pambayad sa utang-panlabas. Ang PD 1177 ay isinabatas noong panahon ni Marcos subalit nanatiling ipinapatupad hanggang ngayon simula nang ipaloob ito sa Administrative Code noong panahon ni Aquino. Sa mahabang panahon ay malaking halaga ng salapi ang inilalaang pambayad-utang na karamihan ay hindi talaga pinakinabangan ng mga mamamayan. Usapin ito ng karapatang pantao sapagkat ang dapat na inilalaan sa batayang serbisyong panlipunan ay nawawaldas lamang sa mga maanumalya, di-produktibong at di-lehitimong pagkakautang. Ang pagpapawalang-bisa ay matagal na dapat isinulong. Wala pa ring kasiguraduhan kung ano ang kahihinatnan nito sa hinaharap.
